Nkosingiphile Ntombela
Ukwanda kwezigameko zokubanjwa kwenkunzi kuphinde kubulawe nabantu endaweni yase Copesville/ Swappo namaphethelo, ezinye zezinto ezenza umphakathi ohlala kulendawo ulale obenyoni.
Ekhuluma nethimba leBhekiziwe Media uMnu Mhlongo weNjoms Security obehola ithimba eligasele eSwapo kungalindelwe kulempelaveki yephasika esiphuma kuyo, unabe kabanzi ngendlela abazimisele ngayo ukuqeda izigalimkhuba kulendawo esidume ngobugebengu osebuyinsakavukela okwenzeka emini nasebusuku nalento yokwanda kokubulawa kwabantu khona lapha Copesville eMgungundlovu.
“SiyiNjoms sisebenza ngokuzinikela ekuqedeni ubugebengu eMgungundlovu nakuzozonke izindawo esisebenza kuzo njengoba sigasele eSwapo ngenhloso yokuzoqoqa izikhali ezikulomphakathi ohlezi usematheni ngamacala okubanjwa kwenkunzi nokubulala.Sifike sathola uhlobo lwezikhali okungavumelekile ukuphathwa emphakathini,simile sisazogasela kuzozonke izindawo ezinezidleke zezinswelaboya,lokhu sizokwenza ngokubambisana namaphoyisa.Okumqoka kulamaholidi ephasika sikwazile ukunqanda ubugebengu lapho kuhlukunyezwa umphakathi ngoba kungamaholidi savikela nezindawo lapho kunezinkonzo zephasika,okumanje okumqoka ukuqeda izidleke lapho kuhlanganwa kuzohlelwa izenzo zobugebengu.Sibonga nokubambisana nomphakathi ongathuli mawubona izenzo zobugebengu usazise ngokushesha sifike sizonqanda sibophe lakumele sibophe khona njengoba abanye besahamba izinkantolo ngamacala esigcina sizibambela thina siyiNjoms okuwumsebenzi esizinikele ukuthi kuphephe umphakathi ngasosonke isikhathi.
Ilokhu ivela lento yokuthi, akhona amaphoyisa asebenzisana nezigebengu ukuze kube khona akuhlomulayo, lokho kwenza kube nzima ukuthi izigebengu zithole isijezo ezisifanele ukuze nabanye bafunde baphinde besabe ukwenza okubu. Siyanxusa ukuthi amaphoyisa asebenzisane kunye nathi ukuze umsebenzi ube lula nezidleke zazo izinswelaboya zehle” Kuphetha yena u Njomane
Abahlali base Copesville/Swappo bafisa ukuthi i Njoms Security ihlale ivakashela kulendawo ngelekhulu ithemba lokuthi kungahamba kube nozinzo nempilo engcono ephephile.