Nkosingiphile Ntombela
Ibenesasasa i-Annual Winter School Camp kwisizwe saKwa Malinga ebesibambisene nenhlangano yamakholwa Abazoba Nehloso Bible Group ekuhleli ingqophamlando yosuku lokucija intsha yesizwe saKwaMalinga.
Kubanjwe ngempumelelo uhlelo lokucija abafundi ngaphansi kwesizwe saKwaMalinga okuwuhlelo okubizwa nge Annual Winter School Camp endaweni yase Uitval eMnambithi.Loluhlelo luqalwe ngamaholidi asebusika laphothulwa ngezi 06 July 2024.
I-Annual Winter School Camp beyithanyelwe abafundi abangamashumi amahlanu nesishiyagalombili ababekhona kuloqeqesho lasebusika. Loluhlelo luyisiyisinyathelo esisungulwe ukuhlinzeka ngoxhaso olwengeziwe kubafundi bakaGrade 10 kuya ku-12. Kugxilwe ezifundweni eziningi zesikole, ikakhulukazi iMathematics, Accounting, Physical Science ne-English okuyzifundo ezimqoka ekumele bacijwe kuzo abafundi ukuze bakwazi ukuncintisana nezinye izizwe.
Ngokwesitatimende esiphume kwiMalinga Clan Foundation, ongunobhala uMnumzane Mhlonishwa Malinga unabe kabanzi ngeqhaza lemfundo ekufukuleni isizwe saKwa Malinga.
“Imfundo idlala indima ebalulekile ekuqedeni ubuphofu. Alikho izwe eliphumelele uma lingabafundisanga abantu balo. Akukona nje kuphela ukuthi imfundo ibalulekile ekunciphiseni ubuphofu, futhi kuyisihluthulelo sokuvula inqwaba yamathuba. Sikhuthaza abafundi abasha abebehambele loluhlelo ukuba basebenze kanzima futhi bathuthukise amamaki abo emkhakheni wesayensi, ubunjiniyela, ubuchwepheshe, ukuhweba, kanye nezibalo ukuze bazofaka isandla ngokuqhubekayo ekuguqulweni nasekuthuthukeni kwezwe lethu.
Loluhlelo luzoqinisekisa ukuthi intsha yeMalinga Clan Foundation ihlala iyisizwe esincintisana emhlabeni wonke, icebile ngokutholakala okusha kanye nabahamba phambili ngaphakathi komfelandawonye wesayensi.”kusho uMhlonishwa Malinga
Izethameli zohlelo bekukhona uMnuz Sibanyoni oyiPhini likaThishanhloko waseMawele High School, uMnuz Phungula oyiBamba likaThishanhloko waseMawele High School, uMnuz Phumudzo Mukwevho waseCCG Technology Systems , uMnuz Ndabezinhle Mabuya waseGood News Company.
Amalungu alawula ukuphathwa kwezikole nawo abekhona uNksz Madondo oyilungu leMawele High School SGB naye ubeyingxenye yokuqeqesha kuhlelo lokuqondisa abafundi bethu ngamakhono okuphila.
I Annual Winter School Camp iphinde yahlonishwa ngokubakhona kamafungwase wakwaMalinga Nksz Fikile “Mancu” Malinga Makhunga ofike wacobelela intsha ngamazwi akhe obuhlakani.
Lohlelo beluxhaswe iMoti Group, neCCG Technologies Systems abenze lolu hlelo lwaba yimpumelelo.Khonamanjalo kubongwe zonke izikole ezibambe iqhaza kulohlelo lokuthuthukisa abantu abasha.